AP fekk i møte i HSU 24 januar støtte for vårt framlegg om at det nyoppretta Folkehelserådet i Flora Kommune får i oppgåve å sette i gang det nødvendige arbeidet for å søke om medlemsskap i Safe Community.

“Trygge lokalsamfunn” er eit WHO-konsept som vektlegg forankring, systematikk, langsiktigheit og samarbeid på tvers av fagområde og organisatoriske skilje som metode i arbeidet for å førebygge skader og ulykker.

På folkehelsedagane i slutten av november 2011 utfordra fylkesordførar Åshild Kjelsnes alle kommunane i fylket til å bli trygge lokalsamfunn. Per i dag er Sogn og Fjordane det einaste fylket i landet som er utnemnt og godkjent som trygt lokalsamfunn (Safe Community) av verdens helseorganisasjon. Høyanger og Årdal er dei einaste kommunane i fylket som har denne statusen.

Flora Kommune er allereie med i eit samarbeid med fylkeskommunen om ei langsiktig satsing for å førebyggje skadar og ulukker i kommunane.

Kommunane som deltek skal sjølve definere spesifikke fokus- og tiltaksområdde i eigen kommune – om det gjeld skadar og ulukker hos eldre, sport- og fritidsskader, rus/vold, trafikkulukker eller andre områder.

I det samarbeidet er det ikkje noke krav om at kommunane skal søke om medlemskap i Safe Communities/Trygge lokalsamfunn, men Karianne Torvanger, fraksjonsleiar for Ap i HSU, er glad for at eit samrøystes HSU gjekk inn for at Flora Kommune skal forplikte seg meir i dette arbeidet ved at det nyoppretta Folkehelserådet skal sette i gang arbeidet med å søke om medlemsskap.